Jaogot

8 May

Si Jaogot
Mansai dao sian huta LUMUT, ima inganan ni Pdt van Asselt , pola do tahe dalanan 7 ari najolo. Adong do sada tao na uli na bidang, na margoar Tao Toba. Rarak do angka huta humaliang tao i. Sada sian angka huta na di topi ni tao, maringanan do sada ripe raphon tolu anakhon nasida. JAOGOT do goar ni anak nasida na umbalga, namumur hira-hira 11 taon. Tinodoho ni si Jaogot i, ibotona na marumur 6 taon. Marumur sataon do anggina, ima na ummetmet, na sai tong dope tangking di ompaan ni inangna i maipat ari.

Di na sadari, didok inang na i ma: “Ingkon laho do ahu sadari on tu onan manuhor sira, ;’ “denggan do i :inna ama mangalusi. Alai boann ma dakdanak na metmet i. Anggo Sibutet on, tu namboruna na di huta na majolo tinaruhon, malojahu molo dohot ibana tu onan.
Alai anggoahu, ingkon dohot do, ai nda tung pasombuonku sahalakmu tusi, sotung di samun halak ho ditonga dalan.
Ia di tingki i masa hamusuon najolo, ndang tarbahen angka ina laho martuaek, manang laho tu porlak manapu lasiak, anggo so mardongan. Ingkon sai adong do sada ama manang doli-doli , na maniop bodil manang sinjata na asing laho manjaga ina i.
Asa laho ma natoras ni si Jaogot i tu onan, ai mansai rikkot sira, ndang boi so adong i. Diompa ma na ummetmet i huhut manghunti par-rasan paronanna. Ama i manghadang bodil di pudina. Sai bereng-bereng do nasida tu siamun dohot tu hambirang, tu angka ramba na di tonga dalan i, atik beha adong panamun monggop disi.
Tinggal di huta ni namboruna anggo boru nasida i, paimahon haroro ni natorasna mulak sian onan; holan si Jaogot do tinggal di huta. Ditadingkon natoraas na do ibana indahan arianna dohot dekke sangkorot, asa adong panganonna, atik beha leleng nasida asa mulak sian onan. Mansai las do roha ni si Jaogot na tinggal di huta i, ai tarbahen ibana marmeami di tao i marguru tu lomo no rohana; marlange, marsolu solu dohot mangungkor.
Jadi andorang na marmeami i ibana di tao, di ida ma ro sada solu, na ni lugaan ni dua halak ama ama mandapothon ibana. Nanget do nasida nadua mangkatai, huhut sai lam di pajonok tu paerlangean ni si Jaogot.Didok nasida ma tu donganna: “ Tasoro ma dakdanak on jala taluhon” Ah ma metmet hu mai, dang tuk i upa loja, inna donganna i mangalusi. Olo, alai dumenggan do na saotik sian na so adong, inna nasida muse. Molo songon i, ba lehet inna donganna i.
DIPAGUS HALAK IBANA.
Dung i marsoara na lambok ma sada sian nasida mandok tu dakdanak i“ Ai ise do tahe goarmu ?” Dialusi dakdanak i attong “Jaogot do goarhu”. Didok na sada muse :” Didia do amanta?” . Bulus do roha ibana mangalusi :”Duansa do natorashu laho tu onan jala diboan anggi-ku, anggo ibotoku rap do dohot namboruku do di huta”. Dung i didok nasida ma muse :” Ro ma ho tu soluon, asa hubohan ho tu amanta. Pinto masuk ma si Jaogot tu solu i, las rohana mandapothon nasida. Ai didok rohana: satokkin nari pajumpang nama ahu dohot damang ma ahu. Alai diboan pamanggus ima ibana, na hona hansi do hape ibana, gabe tangis ma ibana :”Andigan pe asa sahat ahu tu damang?” ninna. Alai muruk ma pamangus i, ai mabiar nasida, atik beha adong halak umbege angguk ni si Jaogot i, Jadi dionjathon ma padungkap tu pamanganna jala didok ma:” Molo sai tangis dope ho pamatehon nami na ma ho”.
DIGADIS TU HALAK NA ASING.
Dung i digadis ma ibana tu halak na asing, jala baoa na manuhor i manggadis ibana muse tu halak na asing, sai songon ima ibana targadis sian sada huta tu sada huta.gabe tung dao situtu ma ibana sian huta ninatoraasna. O….Hansit na i…(uju i.ate.)..
Di ujung na sahat ma ibana tu sada luat, na dingkan hasundutan ni Tano Batak , ima tu LUMUT, inganan ni Pdt. van Asselt, naung tinaringotan nangkin. Begeonta ma ma nuaeng pangaramotion ni Debata di dakdanak na dangol so morsamari i.
Di na sadari maronan do Pdt. Van Aselt tu onan jonok tu jabuna i. Jadi diida ibana ma dakdanak i dihaliangi angka paronan i. Adong do jorat ni rungkung na dibahen pangadis i, asa unang malua, dibalik-balik do tanganna tu tanggurung na jala di rahuti na ginadis tu onan ma Jaogot i. Dung diida ibana tuan i, tarsonggot ma ibana jala mabiar, ai dang hea diida ibana dope jolma sibontar mata. Angkup ni i sai dipandok jolma i ma tu ibana laho mambiarbiari :” ai halak sibontar mata on sipangan jolma do on. Ido umbahen songon i balga i jala ganjang misena dohot janggut na!”
Jadi mangangguhi ma Jaogot dibahen biarna huhut angka hitir. Ianggo van Asselt i, sai mangunduk –unduk ma ibana dibahen asi ni rohana marnida dakdanak na jinorat i. Laos di padonok ma tu lambung ni dakdanak i, asa mangkatai nasida. Dung dibege Jaogot marhata Batak tuan i, mansohot ma ibana na tangis. Longang ibana marnida halak siganjang mise i. Alai dihilala na holong ni roha ni tuan i ibana, sian lambok ni hatana.
Dung disungkun tuan i ma pangadis i, na maniop tali jorat nimol i Jaogot i:”Sadia arga ni dakdanak on?”ninna. ,molo moru sian 24 ringgit Batak hutuhor, asa pongkoki ma pasuang hamu!. Diboto tuan i do nian na margabus panggadis i, alai ala ni asi ni rohana di hararai tuan i ma tali i jala diboan tu jabuna. Las ma roha ni si Jaogot, ai dihilala do holong ni roha ni tuan i di ibana.
Dung dipikkiri tuan i ma manang beha baheonna laho paulak Jaogot tu natoras na alai jut do pikkiranna, Ai asa tung takkas sahat, ingkon ibana do manaruhon, alai dang taerbahen. Ia disuru halak na asing manaruhon dang tagamon so laos mago boti di tongan dalan. Gabe laos tinggal di jabi ni tuan i ma si Jaogot.
Sai dohot do Jaogot rap dohot angka donganna dakdanak, ditingki bot ni ari tu parguruan na pinungka ni tuan i. Dihuruhon ibana ma manjaha, manurat, marende. Mansai ringgas ibana marguru, na torus do torus rohana i jotjot do marpikkir tuan i songon on:” Sai anggiat ma nian Jaogot on paborhaatonku tu tano Bolanda, asa disi diuduti ibana parsikkolaanna ditonga-tonga ni bangsona. Jotjot diboan tuan i sangkapna i tu jolo ni Jesus jala mangido, asa anggiat diaptulus Tuhan i sangkap i hombar tu lomo ni rohaNa.
MARSIKKOLA tu Eropa.
Ia huta Rotterdam, adong do sada guru ale-ale ni tuan i. jadi ditongos ibana ma suratna tu ale-alena i, songon ma hatana:” hamu ale-ale na nihaholongan, Lomo do rohamuna manjangkhon sada dakdanak Batak tu bagas muna? Asa rap marsikkola ibana dohot angka siseaanmuna?”-Ia ale-alena i sada halak Kristen na burju do, jadi dibalos ma surat ni tuan i. dang pola sarihononmuna balanjona, hami sandiri pe pasingkop sude na ringkot di ibana. Paborhat hamu ma ibana!”.
Dung dijaha tuan i surat ni ale ale nai, mansai las ma rohana, pnitor martangiang ma ibana, didokma :”Ale Tuhan Debata, molo lomo ni roham do borhat si Jaogot on tu tano Bolanda, sai ho ma na patongonhon donganna asa sahat ibana tu huta sitopotanna, Amen.”.
Dung salpu manang piga ari dung ro barita halalas ni roha na sian bariba i, lao ma tuan i tu Sidempuan manopot sada doktor naung tinandana. Somal do laho ibana mangalap ubat sian doktor i, silehononna tu angka na marsahit. Di na laho mulak tuan i, didok doktor ima tu ibana,” Tar 3 bulan nari borhat ma hami tu Eropa perlop. Beha, tapatoho hamu do sada halak Batak naburju di hami, na tarbahen mangurupi inanta marorot angka dakdanak i di kopal i? , mauliate!” ninna tuan i dibagasan rohana, Nunga ditangihon Debata tangiang-ki; tarbahen Jaogot ma hape laho tu tano Bolanda, nunga adong donganna na tangkas lago tusi, jadi sian las ni rohana didok ma tu doktor i;”denggan mai doktor ai adong do nuaeng saada dakdanak di bagasnami naburju na ringgas mulaulaon jala na paujunghon parsikkolan disi. Jaogot ma goarna . Jadi didok doktor i ma muse :nunga une be i, las ma rohananami maboan ibana. Beha, tarbahen hamu do mamboan ibana tuson? Ai ringkot do i, asa hutanda hami ibana; dung i muse asa tangkas masitandaan dohot angka dakdanaknami, asa dipasomalsomal hian manjaga nasida”.
Mardongan ls ni roha, dioloi tuan i ma pangidoan ni doktor i, dung i marhata partadingan ma Jaogot tu tuan i laho borhat tu Sidempuan. Tangis ma ibana di bahen habot ni roha rohana, laomanadingkon tuan i, na doshon pangintubu di ibana. Dung sahat ibana tu jabu ni doktor i, sabam ma muse rohana, ala na burju ni doktor tu ibana. Domu muse ti basar ni Nyonya ni doktor i mangajar ajari ibana.
Dung jumpang tingkina, borhat ma ma doktor i dohot sude nasida saripe laho masuk tu kopal; dohot ma nang si Jaogot. Dung manang sadia leleng nasida markopal, sahat ma nasida tu huta Roterdam. Dung i dipasahat doktor ima jaogot tu guru, ale ale ni Van Asselt.i.
Ianggo Jaogot, nunga tibu diguruhon ibana hata bolanda. Jadi dihasasahat di nasida tu Roterdam, nunga boi ibana magnaktai Bolanda, so pola hasurahan be. Marssikkola ma ibana raphon dohot dakdanak ni Bolanda i. Godang tamba parbitonoanna , ala parroha na torus ibana. Marsangkap do ibana, naeng gabe guru, laho mangajari donganna sabangso, an di tao Batak. Domu tusi, naeng parjamita ibana, didok rohana. Sai ido manggoki rohana arian dohot borngin.
Dukhon i angka parsiajaran na somal, di guruhon ibana do dohot marpoti marende (PIANO). Al ni ringgas na manggguruhon music, gabe malo ma ibana mamamalu potimarende. Dina saahali bodari ni ari Sabtu. Mamalu potimarende ma ibana di jabu ni sorangna i.
Adong do sada donganna manompang di jabu i i na margoar Si hendrik. Jadi ro iban tu bilut inganan ni Jaogot na marpotimarende i. Di pudina adong do sada meja, jala peak disi hepeng ni guru i. Anggo didok rohana dang botoon ni Jaogot na binahenna i. Hape diida ibana do marhite sorminan(cermin) ni jolona, na siatas ni potimarende na pinalu nai. Pintor mansohot ma ma ibana na mamalu i didok ma tu si Hendrik ”Halak na jahat do ho hape!” Boasa tangkoon mu hepeng na di atas ni meja ?
Mansai muruk ma si Hendrik , ninna ma “Apala ho do mabuat hepeng i, hape dipabalik ho tuahu halak na so hasea do ho!”. Dung marbadai ma nassida pola guntur di bilut i. Dibege guru i ma gaor di bilut i jala nanget ma didaptohon nasida./ So panagaman ni Si Hendrik pintor di rorohon guru ima tanganna tu saku ni ni bajuna jala dapotsa ma disi hepeng i. Dung i didok guru ima tu ibana: Laho ma ho tu bilutmu, ro pe ahu annon tusi, disi pe hupaboa manang aha uhum tu ho nunga bagas borngin” Dung didok Jaogot :”selamat malam” tu guru i, laho ma ibana modom. Alai ndang olo nok matana, sai lalho rohana tu na masa nangkin. Gabe ro ma soarana mandok : toho do najahat si Hendrik na mangangko hepeng i: alai ho pe ale Jaogot godang do dosam. Ingot ma jolo angka salam uju di bagas natorasmu ho dohot uju dibagas ni Van Asellt, Dijabu ni doktor, di kopal dohot dung saahat ho tu jabo on.
Umbege Soara na nidok ni soara i tarsonggot ma ibana marningot sude dosa na, jadi las ma gaor ma nipina saborngin i . Sogot manogot i , laho ma ibana mandpothon guruna i, dipajojor ma ma suden a masaa borngin i dohot solsol ni rohana diangka dosana. Dung diida guru i asing pangalaho niJaogot sian na somal, rap ma nasida Marsinggang martangiang tu Debata Ama.
Olt ni ima, tung tangkas diantusi ibana, alana umbahen pola mate Jesus humophop angka padosa. Mansai holong ma ibna . Kristen na tutu. Tangkas ma mananda ibana manghaholongi ibana ala ni haburjuonna.
Ianggo Van Asselt Mansai las do rohana ganup hali ro do surat sian bariba, na paboahon haburjuon dohot maju ni parsikkolaanna. Sai on do ro tu rohana, Tabahen Jaogot ma muse mangula tu tano Batak, laho manogu-nogu donganna sabangso tu hatiuron.
SIHOL NI ROHANA MANGULA DI TNO BATAK.
Laos songon i do pingkiran ni Jaogot.Sai jotjot ditangiangi ibana maardongan ilut-ilu bangsona Batak i, natoras na dohot tondongna na di haholomon i, asa sahat tu nasida hatiuron ni Barita na uli i, jala molo tarbahen asa dipangke Debata ibana tu ulaon i. Alai dison ma jumpang na tarsurat di raja salomo Poda 16,9 : ” Roha ni Jolma marsangkap dalanna alai Jahowa do patontuhon langkana” .Ai disada tingki hamamasa ni ngali, hona sahit rak ma ibana. Jadi dung masa manang na sadia leleng diae ibana ma sahit i, monding ma ibana dibagasan dame, laho mandapothon Jesus sihophop ibana.
Dang saut ibana mulak tu tano Batak, songon na tinongken ni rohana. Alai ditangihon Debata Ama do tangiangna. Hirahira 25 taon nari nunga lobi sajuta nueng Kristen Batak, so nietong angka na mariibu maung monding,dibagasan haporseaon sogon Si jaogot naung lahomandapothon Sipalu ibana.
Ope pe ale dongan, nunga taida panogu nogu ni Debata Ama di sada dakdanak anak ni bangsota sian haholomon tu hatiuron. Halonganan do sude angka daalan i. Didok songon timbo ni langit siat tano on do tumombo pingkiran ni Debaata aian pingkiranta. Taida do dihol ni Jaogot i di hararat ni ni harajaon ni Debata di bangsota dohot gomos ni tangiangna. Sai diurupi Tuhanta ma hita marrohaon roha sisongon i, jala tung sian nasa rohanta mandok mauliate tu Debata, ala naung ni rorona i bangsonta sian haholomon jala di pasaut tu hatiuron.

“ na nienet sian Zendings-bladj;v,Asselt Achttien jaren onder de Batak, al 35 d.u.50-55”

About these ads

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Follow

Get every new post delivered to your Inbox.

%d bloggers like this: